You are currently browsing the category archive for the ‘ஆரோக்கிய உணவு’ category.

வேட்டைக் காலம் முடிய மனித நாகரீகத்தின் ஆரம்பமாக விவசாயம் செய்ய நதிக்கரை ஓரங்களில் குடியேறினர்.

சோறும் தானியங்களும் பழைய கால பிரதான உணவாக இருந்திருக்கின்றன. தினைப்புலம் காத்த வள்ளியும் எங்கள் புராணக்கதையில் இருக்கின்றார்.

ஆரியர்கள் தானியங்ளைப் பயிரிட்டு இருந்தார்கள் என்பதை பாரம்பரிய கதைகளிலிருந்து அறிகின்றோம். பாளி நூலில் 307 வகையான நெல்லினங்கள் காணப்படடன என்கிறார்கள்.

நன்றி commons.wikimedia.org

பழம் தமிழர் உணவுகள் தினைச்சோறு, சாமைச்சோறு, வரகரிசிச் சோறு,உழுத்தம் சோறு, வெண்சோறு, கம்பஞ் சோறு, மூங்கில் அரிசிச் சோறு,  நீர்ச் சோறு, குறுணி அரிசிச் சோறு, கூட்டாஞ் சோறு, என பல்சுவைப் பட்டதாக இருந்திருக்கின்றன.

ஆசிய நாட்டவர்களின் பிரதான உணவு நெல் அரிசிச் சோறு. இலங்கையும் அரிசி உணவை உண்ணும் முதன்மை நாடாக விளங்குகிறது.

நன்றி eelamlife.blogspot.com

இலங்கையில் வடக்குக் கிழக்கு உள்ளிட்ட பல பாகங்களிலும் நெல் பயிரிடப்பட்டு வருகிறது.

உலகில் அதிகம் உண்ணப்படும் தானியம் அரிசியே ஆகும். 40க்கு மேற்பட்ட நாடுகளில் அரிசியே பிரதான உணவாக இருக்கிறது.

Thanks:- perfecthealthdiet.com

அரிசியுணவுண்ணும் நாடுகளில் (China, India, Japan, Indonesia, and southeast Asia; and in sub-Saharan Africa) உடல் அதீத பருமனடைவோர் (Obese) குறைவு என்கிறார்கள். படம் மேலே.

உலகளாவிய ரீதியில் உணவிலிருந்து கிடைக்கும் சக்திப் பெறுமானத்தில் 20 சதவிகிதத்தை அரிசியே வழங்குகிறது. அதே வேளை கோதுமை 19 சதவிகிதத்தையும், சோளம் 5 சதவிகிதத்தையும் வழங்குகிறது.

கலர் கலராகவும் அரிசிகள் கிடைக்கின்றன. நாம் காணும் வெள்ளை அரிசி, தவிட்டு நிற அரிசி என்பவற்றிக்கு அப்பால் சிவப்பு, கத்திரிப்பூ கலரிலும் கிடைக்கின்றன.

கீழே Korean Purple Rice and Beans

Thanks:-  mightysweet.com

இலங்கையைப் பொறுத்தவரையில் அரிசி உற்பத்தியில் தன்னிறைவு அடையவில்லை. இந்தியா சீனா போன்ற வெளி நாடுகளிலிருந்து அரிசி இறக்குமதி செய்யப்படுகிறது.

மாறி வரும் கால நிலை மாற்றங்களும், நீர் பற்றாக் குறையும் மழையின்மை, வரட்சி, வரட்சிக்குப் பின்னான பெருவெள்ளப் பெருக்குகளாலும் பயிரிடுவதில் பிரச்சனைகளும் சவால்களும் எழுகின்றன. நிலத்தடி நீர் வரட்சியடையும்போது உவர்ப்புத் தன்மை உண்டாகும். கடல் நீர் உயர்வதாலும், கடல் நீர் உட்புகுந்து நிலத்தடி நீர்உப்பு நீராக மாறுவதாலும் உணவு உற்பத்தியும் பாதிப்படைகிறது.

சீனாவில் வரட்சியடைந்த ஒரு நீர்த் தேக்கத்தில் மிருகங்களும் மனிதர்களும்….

உலகில் அதிக அரிசி ஏற்றுமதி செய்யும் வியட்நாம் மக்கான் டெல்டா பகுதியில் புவி வெட்பத்தால் கடல் நீர் உட்புகுந்து நெல்வயல்கள் அழுகிப் போய் உற்பத்தியும் பாதிக்கப்பட்டது. தொடர்ச்சியான அதீத உரவகைளின் இரசாயனப் பாவனை நிலத்தின் உற்பத்தித் தன்மையைக் குறைக்கின்றது என்கிறார்கள்.

நெல்லைத் தாக்கும் நோயில் பக்டீரியாவின் தாக்கமே அதிக பாதிப்பைத் தருகின்றது. இதைத் தடுக்க இந்தியாவின் ஆந்திரப் பிரதேசத்தில்; புதியரக நெல் அண்மையில் கண்டுபிடிக்கப்பட்டுள்ளது. ‘சம்பா மசூ10ரி’ என்ற பெயரிடப்பட்டுள்ள இவ்வினம் பக்றீரியா நோயினால் ஏற்படும் தாக்கத்தை தாங்கக் கூடிய இனம் என்கிறார்கள். இவ்வினத்தை நெல் ஆராச்சி நிலையமும் உயிரியல் மையமும் இணைந்து உருவாக்கியிருக்கிறார்கள் என்பது வரவேற்கத்தக்க சிறப்பம்சமாகும். உயரி தொழில் நுட்ப கருவி ஒன்றைப் பயன்படுத்தித் தயாரிக்கப்பட்டுள்ளது. பல்வேறுபட்ட சோதனைகள் மேற்கொள்ளபட்டு இதன் தரம் உறுதிப்படுத்தப்பட்டுள்ளது. 

நன்றி:- sreechandrab.sulekha.com பாரம்பரிய முறையில் அறுவடை

ஆரம்பத்தில் தனிமனித உழைப்பால் உருவாக்கபட்ட நெல் விளைச்சல் நாளடைவில் யந்திரங்களின் உதவியுடன் நெல் வெட்டுதல் பணிகள் மேற் கொள்ளப்படுகின்றன.

இயந்திரங்களின் உதவியால் நெல் அறுவடை

நெல் புல் வகையைச் சேர்ந்த தாவரம். தென்கிழக்காசியாவில் தோன்றியது என்கிறார்கள். நாற்று நடுவதற்கு நாற்றுக்கள் முப்பது நாள் பயிராக இருக்க வேண்டும்.

நன்றி blog.balabharathi.net

நெல் 5 மாதங்கள் வரை வளரக் கூடிய ஒருவருடத் தாவரமாகும். உலகில் முதல் முதலாக ஆசிய நெல் ஆபிரிக்க நெல் என இரு இன நெற் பயிர்கள் பயிரடப்பட்டன என்கிறார்கள். ஆசியாவில் நெற் சாகுபடி கி.மு 4500 முன்பாகவே பல நாடுகளில் ஒரே நேரத்தில் தொடங்கியதாகக் கூறப்படுகிறது. ஆசிய நெல் சிற்றினம் இமயமலை அடிவாரத்தில் தோன்றியதாக அறியப்படுகிறது.

உலகில் சோளத்திற்கும் கோதுமைக்கும் அடுத்ததாகப் பயிரப்படுவது நெல்தான்.

நாட்டரிசி, மொட்டைக கறுப்பன் அரிசி, வவுனியா அரிசி, வரணி அரிசி, தம்பலகாமம் வயல் நெல் அரிசி, இறத்தோட்டை வயல் நெல், என்றெல்லாம் வண்டில், லொறிகளில் மூட்டை மூட்டையாக பயணித்து வந்தன. பத்தாயங்களில் சேகரித்து வைக்கப்பட்டு கொத்துக்களால் அழந்து எடுக்கப்பட்ட காலங்கள் எல்லாம் மறைந்துவிட்டன. நெல் அவித்து நிழலில் உலர்திக் காயவைத்து உரலில் இட்டு உமி தீட்டி புடைத்து மண்பானையில் இட்டு சோறு ஆக்குவது பாட்டிகாலம் அதன் சுவை இப்போது உண்ணக் கிடைப்பதில்லை.

முற்றத்தில் உலர்திய நெல்லை அணில், குருவிகள், காகம், கோழி கூட்டாக உணவு உண்ணும். உமிக்குருவிஎன்றே ஒரு குருவியினம் இருக்கின்றது. இரவில் எலிகளும் வெட்டிக் கொள்ளும். எறும்பும், அந்துப் பூச்சிகளும் உணவாக்கிக் கொள்ளும்.

போஷாக்கைப் பொறுத்த வரையில் அரிசியில் அதிகமிருப்பது மாப்பொருள்தான். ஆயினும் ஓரளவு புரதமும் இருக்கிறது . இவற்றைத் தவிர நார்ப்பொருளும் அதிகம் உண்டு. தயமின், நியாசின், ரைபோபிளேவின் போன்ற விற்றமின்களும் அதிகமுண்டு. ஆயினும் தீட்டாத அரிசியிலே இவற்றின் செறிவு அதிகமாக இருக்கும். நன்கு தீட்டும்போது தவிட்டுடன் இவை நீங்கிவிடுகின்றன. தவிடு உண்ணும் மாடுகளுக்கு நல்ல போஷாக்குக் கிடைக்க சக்கையை நாம் உண்கின்றோம்.

Rice Nutrition Chart
Rice Type   
Protein (g/100g)   
Iron (mg/100g)   
Zinc (mg/100g)   
Fiber (g/100g)
White Rice (polished)   
6.8   
1.2   
0.5   
0.6
Brown Rice   
7.9   
2.2  
0.5   
2.8
Red Rice   
7.0   
5.5   
3.3   
2.0
Purple Rice   
8.3   
3.9   
2.2   
1.4
Black Rice   
8.5   
3.5   
–   
4.9

கால மாற்றத்தில் வெள்ளை அரிசிகள் முதலிடம் வகிக்கின்றன. சம்பா, பொன்னி, பாஸ்மதி, பாட்னா, சூரியச்சம்பா, எனப் பல்வேறு பெயர்களில் வலம் வருகின்றன. மக்களும் சுவை அதிகம். சமைக்கும் நேரம் குறைவு எனக் காரணம் கூறி இவற்றையே நாடுகிறார்கள்.

தற்கால உணவுப் பழக்கங்களில் உடல் நலம் பற்றிய அக்கறை குறைந்து நாவின் சுவை குறித்த பார்வையே மேலோங்கி நிற்கிறது. இதனால் நாட்டரிசிச் சோற்றை மக்கள் பெரிதும் விரும்புவதில்லை. மெதுவான வெள்ளை அரிசிச் சோற்றையே விரும்புகிறார்கள். அதனால் உண்ணும் அளவும் அதிகரிக்கிறது. எடுக்கும் அளவு கூடுவதால் நீரிழிவு,கொலஸ்டரோல் வருவதற்கு ஏதுவாகின்றன.

அரிசியை வடித்து கஞ்சியைக் கொட்டி சத்துக்களை வீணாக்காமல் சமையுங்கள். கஞ்சியை வடித்தால் வீட்டில் உள்ளோர் பகிர்ந்து குடித்துவிடுங்கள்.

நாட்டரிசிச் சோறு

தேவையானவை
நாட்டரிசி – 1 கப்
தண்ணீர்  – 2 1/4 –  2 1/2 கப் 

செய்முறை

அரிசியைக் கழுவி, கல்லிருந்தால் அரித்து விடுங்கள்.
பிரஷர் குக்கரில் இட்டு தண்ணீரை விட்டு 5 விசில் வைத்து எடுங்கள்.
ரைஸ் குக்கரில் சமைத்தும் எடுக்கலாம்.

-: மாதேவி :-

0.0.0.0.0.0.0
Advertisements

உயிரினம்  வாழ்வதற்கு உணவும் நீரும் அத்தியாவசியமானவை. காற்றைப் பற்றிச் சொல்லவில்லை என நிகைக்காதீர்கள். அதையும் சேர்த்துக் கொள்வோம். ஆனால் அது சமையலில் சேராதே!

இவை யாவும் அவசியமாக இருந்தபோதும் உடல் ஆரோக்கியமாக இருப்பதற்கு எவ்வகை உணவுகளை உண்ண வேண்டும் என்ற கேள்வி பலர் மனங்களிலும் எழுகின்றது.

நாவுக்கு சுவை தரக் கூடிய உணவுகளையே மனம் நாடி நிற்கும். இனிப்பு,காரம் உப்புக் கலந்த,  எண்ணெயில் பொரித்த சுவையான உணவுவகைகளை விரும்பி உள்ளே தள்ளிக் கொண்டிருக்க யாருக்குத்தான் ஆசையில்லை.

கொழுப்பு நிறைந்த பிட்ஷா, பர்ஹர், சிப்ஸ், பேஸ்டி, கேக், டோனட் உணவுக் கூடங்களை மக்கள் அலையாக மோதுவதைக் காண்கின்றோம்.

குப்பை உணவு junk food என்ற சொல்லை இப்பொழுது ஆங்கிலத்தில் உபயோகிக்கிறார்கள். ஆனால் குப்பையை அள்ளி வாயில் போடுவதில்தான் பலருக்கு நாட்டம்.

குப்பை உணவு

குப்பை உணவு என்றால் என்ன?

போஷாக்கு மிகவும் குறைவான உணவுகள் அவை.

  • அதே நேரம் அவற்றில் மிக அதிகமாக எண்ணெய், கொழுப்பு, இனிப்பு கலந்திருக்கும் 
  • அவற்றின் கலோரிப் பெறுமானம் மிக அதிகமாக இருக்கும். 
  • உப்பும் பொதுவாக அவற்றில் மிக அதிகமாகச் சேர்க்கப்பட்டிருக்கும். 
  • ஆனால் போஷாக்குக் கூறுகளான புரதம், விற்றமின்கள், தாதுப் பொருட்கள் மிகக் குறைவாகவே இருக்கும்.

இவ்வகையான கொழுப்பு உணவுகளை அதிகம் உண்பதால் ஏற்படும் விளைவுகளையும் அறிந்துதான் இருக்கின்றோம்.

இருந்தும் இந்த நாக்கு எம்மை விட்டபாடில்லை. கணக்கு வழக்கின்றி இவற்றை விழுங்கிக் கொண்டே இருக்கிறது.

ஏன் எமது நாக்குகள் இவற்றை விட்டுவிடாது துரத்திப் பிடிக்கின்றன என்பதை பின்னர் பார்ப்போம்.

நாம் தினசரி உணவுகளை எந்த விகிதத்தில் உண்ண வேண்டும் என்பதை உணவு பிரமிட் சுட்டிக் காட்டுகிறது.

தானியங்களினால் உணவு அதுவும் முக்கியமாக தீட்டி தவிடு நீக்கப்படாத தானியங்களினாலான உணவு அதிகம் சாப்பிட வேண்டியதாகிறது. தினசரி 6 சேர்விங் என்கிறார்கள். இவை முக்கியமாக மாச்சத்தைத் தருகின்றன.

அடுத்து காய்கறிகளும் பழங்களும் கிட்டத்தற்ற அதற்கு இணையாண அளவு உட்கொள்ளப்பட வேண்டியவையாகும். அதாவது காய்கறிகள் 3 சேர்விங் மற்றும் பழ வகைகள் 2 சேர்விங் என மொத்தம் 5 ஆகிறது. இவற்றில் இருந்து பெருமளவு நார்ப்பொருளும், விற்றமின் கனியங்கள் கிடைக்கின்றன.

புரதங்களைப் பொறுத்த வரையில் பால், தயிர், யோர்கட். சீஸ் போன்றவை 3 சேர்விங், மீன், இறைச்சி, கோழியிறைச்சி, பருப்பு பயறு கடலை போன்றவையும், விதைகளுமாக 2 சேர்விங்  உட்கொள்ள வேண்டும்.

ஆனால் மிகக் குறைந்த அளவு எடுக்க வேண்டியவை கொழுப்பு, எண்ணெய், இனிப்புகளாகும். இந்த குறைந்தளவு எடுக்க வேண்டிய உணவின் கூறுகளே குப்பை உணவுகளில் அதிகம் கலந்துள்ளன என்பதைக் கவனிக்க வேண்டும்.

எல்லாவற்றிலும் அதிகமாக எடுக்க வேண்டியது நீர். அதாவது சாதாரண நீர் மட்டுமே.

மென்பானம், குளிர்பானம், மதுபானங்கள் போன்றவை இதில் அடங்கவில்லை என்பதைச் சொல்லியா தெரிய வேண்டும்.

அடிமையாகும் நாக்கு

ஏன் எமது மனமும் நாக்கும் வேண்டாத உணவு வகைகளுக்கு அடிமையாகின்றன?

இது பற்றி 2008 ல்  Paul Johnson and Paul Kenny ஆகியோர் ஒரு ஆய்வு செய்தார்கள். அதன்படி குப்பை உணவுகள் எனப்படுபவை எமது மூளையின் கலங்களில் மாற்றங்களை ஏற்படுத்தி அதை நாடச் செய்கிறது என்கிறார்கள். இது கொகேயின், ஹெரோயின் போன்ற போதைப் பொருட்கள் தமக்கு எம்மை அடிமையாக்குவதற்கு ஒத்ததாகும்.

பல வாரங்களுக்கு அத்தகைய குப்பை உணவுகளை அளவுகணக்கின்றி உண்பதால் மூளையில் உள்ள இன்ப மையங்கள் (pleasure centers) அவற்றிற்கு இசைவாகி மேலும்மேலும் மகிழ்ச்சிக்கான உணவையே நாடும்.

கருவிலும் பாதிக்க ஆரம்பிக்கிறது

இத்தகைய குணமானது வளர்ந்த மனிதர்களை மாத்திரம் பாதிக்கிறது என எண்ணிவிடாதீர்கள். கர்ப்பமாயிருக்கும் தாய் இவ்வாறான தவறான உணவுப் பழக்கத்தில் மூழ்கி இருந்தால் கருவில் வளரும் குழந்தைகள் பிறந்த பின்னர் இத்தகைய தவறான உணவுப் பழக்கத்தையே நாடும் என 2007ல் British Journal of Nutrition செய்த ஆய்வு கூறுகிறது.

அவசரத் தீனிகள்

இத்தகைய குப்பை உணவுகளின் தாயகம் கடை உணவுகள்தான். பெரும்பாலான உடனடியாக உண்ணும்படி வாங்கும் உணவுகள் இத்தகையவை. அவசர உணவுகள்,  திடீர் உணவுகள் (Fast foods) என்றெல்லாம் அழைக்கிறார்கள். வசதியான உணவுகள் convenience foods என்ற மற்றொரு பதமும் உண்டு.

அவசரத் தீனிகள் ஏன்? 



 இதற்குக் காரணம் இன்றைய வாழ்வானது அவசரமும் இயந்திர மயமும் ஆகிவிட்டது.

இத்தகைய உணவுகள்

  • உடனடியாகக் கிடைப்பது மாத்திரமின்றி, 
  • அதிக விலையுமற்றவை. 
  • இதனால் அனைத்துத் தரத்தினரையும் ஒருங்கு சேர அழைக்கிறது. 
  • இவற்றில் விலை குறைந்த கொழுப்பு இனிப்பு, உப்பு, தவிடு நீக்கபட்ட தானியங்கள் அல்லது அவற்றின் மா ஆகியவையே அடங்கும். 
  • ஆனால் சற்று விலை அதிகமான பொருட்களான போஷனைப் பொருட்களான பழ வகைகள், காய்கறிவகைகள், கொழுப்பற்ற இறைச்சி வகைகள் இருப்பது குறைவு.

இவற்றைத் தடுக்க இந்த நவீன உணவுப் பிரமிட் என்ன சொல்கிறது என்பதையும் பாருங்களேன். தெளிவாப் படிக்க மேலே கிளிக் பண்ணுங்கள்.

புதிய உணவுப் பிரமிட்டானது உணவு வகைகளைப் பற்றிக் குறிப்பிடுவதுடன் நின்று விடாது தினசரி உடற் பயிற்சி அல்லது உடல் உழைப்பு வேண்டும் என்கிறது.

வளர்ந்தவர்களுக்கு தினசரி 30 நிமிடங்களும், வளரும் குழந்தைகளுக்கு 60 நிமிடங்களும் என்பதை வலியுறுத்துகிறது.

எடையைக் குறைக்க விரும்புவர்களுக்கும் குறைந்த எடை மீண்டும் ஏறக் கூடாது எனத் தடுப்பதற்கும் இது 90 நிமிடங்களாகும்.

நோய்களை விதைக்கிறது

இத்தகைய உணவு முறைகளால் இன்று பலரும் அதீத எடை கொண்ட குண்டு மனிதர்களாக மாறி வருகின்றனர்.

ஒருவரது எடை எவ்வளவாக இருக்க வேண்டும். அவரது உயரத்திற்கு ஏற்பவே எடை இருக்க வேண்டும். இது ஆங்கிலத்தில் Body mass index எனப்படுகிறது. சுருக்கமாக BMI என்பார்கள் அதையே தமிழில் இப்பொழுது உடல் நிறை குறியீட்டெண் என அழைக்கிறார்கள். ஒருவருடைய உயரத்தின் அடிப்படையில் ஆரோக்கியமான உடல் எடையை மதிப்பிடுவதற்கு இக் குறியீடு பயன்படுத்தப்படுகிறது.

உங்களது  BMI எவ்வளவு?

உங்களது  BMI யை அறிவது எப்படி? உங்களது எடையை கிலோகிறாமில் அளந்து அதை மீற்றரிலான உங்கள் உயரத்தின் வர்க்கத்தால் பிரிப்பதாகும். இந்த இடியப்பச் சிக்கல் எனக்குப் புரியவில்லை என்பவர்களுக்கு வழி சொல்கிறேன்.

இந்த இணைப்பிற்குச் சென்று நீங்களே சுலபமாக அறிந்து கொள்ளலாம்

இது இலங்கை இந்தியா போன்ற தென்கிழக்காசிய நாடுகளுக்கானது. இலங்கை அரசின் சுகாதரத்துறை அமைச்சினால் வெளியிட்ப்பட்டுள்ளது.
உங்களது உயரத்திற்கு ஏற்றதா? அதிகமா? குறைவா என்பதைத் தருவதுடன் உங்களது உயரத்திற்கு எந்தளவு எடை இருப்பது நல்லது என்பதையும் அறிவுறுத்துகிறது.

நவீன உலகின் உயிர்கொல்லி நோய்களாக

  • நீரிழிவு, 
  • இருதய நோய்கள், 
  • உயர் இரத்த அழுத்தம், 
  • புற்று நோய்கள் 

ஆகியவை இனங்காணப்பட்டுள்ளன.

இவை தொற்று நோய்களை விட வேகமாகப் பரவி கணக்கிலடங்காத உயிர்களைக் காவு கொள்வதற்கு முக்கிய காரணம் இத்தகைய போஷாக்கற்ற உணவு முறைகளே. அவற்றுடன் உடலுழைப்பற்ற வாழ்க்கை முறையும், மாசடைந்த சூழலும் காரணங்களாகின்றன என்பதையும் ஏற்றுக் கொண்டே ஆகவேண்டும்.

உடல் ஆரோக்கியமாக எவ்வளவு உண்ண வேண்டும்.

அதற்கு எவ்வளவு உண்ண வேண்டும்?

அதாவது எமது தினசரி கலோரித் தேவை எவ்வளவு என்பதைக் கண்டறிய இந்த இணைப்பைக் கிளிக் பண்ணுங்கள்

உங்கள் தினசரி கலோரித் தேவை எவ்வளவு

அதெல்லாம் சரி! ஆரோக்கியமான உணவுகள் எவை என்று சொல்லவில்லையே எனக் கேட்கிறீர்களா? whfoods.com இவற்றைப் பட்டியலிடுகிறது.

என்ன இவற்றில் சில எங்கள் நாட்டிற்குக் கிடைக்காதா என்கிறீர்களா? உண்மைதான். இருந்தாலும் இங்கு கிடைக்கும் பல வகை உணவுகளையும் சொல்கிறதே. அவற்றைப் பயன்படுத்திப் பலன் பெறலாமே.

மாதேவி

0.0.0.0.0.0

>அமெரிக்காவில் டெக்ஸாஸ் மாகாணத்தில் அக்ரிலை ஆய்வு நிறுவனம் செய்த ஒரு ஆய்வானது பிளம், பீச் பழங்களில் புற்றுநொயைத் தடுக்கும் மருத்துவ குணம் இருப்பதாகச் சொல்கிறார்கள்.

பினோலிக் அமிலத்தின் கூட்டுப் பொருட்களான குளொரோஜெனிக் மற்றும் நியோ குளேராஜெனிக் அமிலம் போன்ற இராசாயனங்கள்தான் புற்றுநோய் அணுக்களை அழிக்கிறது. இந்த இராசாயனங்கள் பழவகைகள் யாவற்றிலும் காணப்படுகின்றன. இருந்தாலும் பிளம்பழத்தில் கூடுதலாக இருக்கிறது என்கிறார்கள்.

எமது நாட்டில் பயிரிடப்பட்டிருப்பதாகத் தெரியவில்லை. கொம்பிலக்ஸ்களில் விற்பனையாகின்றன.

மென்மையான வட்டமான வழவழப்பான தோலையுடைய சதைப்பிடிப்பான இனிய பழம் இது.

மஞ்சள், வெள்ளை பச்சை, சிகப்பு,ஊதா கலர்களில் இருக்கும்.

பச்சை நிறத்தை அண்டிய வெள்ளைப் பூக்கள் மலர்ந்திருக்கும்.

தேனீக்கள் தேன் உண்ண முயலுகையில் மகரந்தச் சேர்க்கை நடக்கிறது.

Autum காலத்தில் இலைகளை உதிர்த்து Early Spring ல் பூக்களைக் கொடுக்கும்.

பெரிய பழம் 3-6 செ.மீ அளவிருக்கும்.

முற்றிய பழத்தின் மேலே வெள்ளை படர்ந்தது போல இருக்கும்.

மரம் 5-7 மீற்றர் உயரம் வரை வளரக் கூடியது. ரோசேசியே குடும்பத்தைச் சேர்ந்தது. அறிவியல்பெயர் பிருனஸ்சலிசினா.

உலரவைத்த பிளம்ஸ் ப்ருனே Prunes என அழைக்கப்படும்.

வடஅமெரிக்க, ஐரோப்பா, சீனா ஆகிய இடங்களில் இயற்கையில் காணப்பட்டது. ரோமானியர்கள் வடக்கு ஐரொப்பாவில் அறிமுகப்படுத்தினர்.

இதில் பெரும்பாலும் நான்கு வகை இருக்கிறது.

  1. யூரோப்பியன் பிளம், 
  2. ஜப்பானிய பிளம், 
  3. Damsons and mirabeels
  4. Cherry plums.

ஐரோப்பிய இனத்தை விட ஜப்பானிய இனப் பிளம் பெரியதாக இருக்கும்.

“பழம் வாங்கலையோ பழம்..” என இடுப்பில் கடகம் ஏந்தி,
கூவியழைத்து பழ விற்பனைக்கு வந்தாள் சின்னு.
சின்னப் பெண்ணாக இருக்கையில் ….

போட்டியில் பரிசுபெற்ற சின்னுவை, அவளின் வெற்றியின் ரகசியம் என்ன என வினவுகின்றனர்.

பழக்காரியாக சின்னு

ஜப்பானிய பிளம், சைனீஸ் பிளம் என்றே அழைக்கப்பட வேண்டும். ஏனெனில் ஜப்பான் 200-300 வருடங்களுக்கு முன்பிருந்தே சைனாவில் இருந்து இறக்குமதி செய்தது. சைனா 1000 வருடங்களாகவே பயிரிட்டு வந்திருக்கிறது. ஜப்பான் உலக நாடுகளுக்குப் பரப்பியதால் ஜப்பானிய பிளம் எனப் பெயர் வந்தது. ஜப்பானிய பிளம் ஏற்றுமதியில் கலிபோனியா பிரபல்யமான இடத்தை வகிக்கிறது.

நேரடியாக பழத்தை உண்பதுடன் கான்களில் கிடைக்கும். யூஸ், ஜாம், சிரப் தயாரித்துக் கொள்வார்கள்.

பிளம் யூசிலிருந்து பிளம் வைன், பிரண்டி தயாராகும்.

ஆசியாவில் ‘பிக்கிள்ட் பிளம்’ ஒரு வகையாகத் தயாரிக்கப்படுகிறது.

சலட்டாக தயாரித்தும் உண்ணலாம். 

காபோஹைதிரேட் கூடுதலாக உள்ளது. குறைந்தளவு கொழுப்பு உள்ளது.
எடை குறைப்பிற்கு ஏற்ற  உணவு.
விற்றமின் சீ அதிகஅளவில் இருப்பதால் தடிமன் சளியை அண்டவிடாமல் தடுக்கும் என்கிறார்கள்.
நார்சத்தும் அதிக அளவில் இருக்கிறது.

100 கிராமில் உள்ள போசனை

காபோஹைதிரேட் 13.1 கிராம்,
கொழுப்பு 0.62 கிராம்,
Fiber  2.2 கிராம்.
நீர்ப்பிடிப்பு 84 சதவிகிதம்,  
Energy 55 kcal,
புரொட்டின் 0.8 கிராம்.
விற்றமின் சீ 5 மிகி
B1 0.02 மிகி.
B2 0.3 மிகி.
B6 0.10 மிகி.

Vitamin E 0.7>  
Vitamin A 18 ug ,  
Potassium- K 172mg,  
Calcium-ca 4 mg.   

பிளம் சலட் செய்துகொள்வோமா.

தேவையான பொருட்கள்

  • பிளம் பழம் – 2
  • பச்சை ஆப்பிள் – ½
  • கிறேப்ஸ் விதையில்லாதது – 5-6
  • துளசி இலை – 6-7
  • தேன் – 2 டேபிள் ஸ்பூன்
  • லெமன் ஜீஸ் – 1 டேபிள் ஸ்பூன்
  • சோல்ட், பெப்பர்பவுடர் – சிறிதளவு

செய்முறை

பழங்கள், துளசி இலைகளைக் கழுவி எடுங்கள.;

பிளம்,ஆப்பிளை மெல்லிய நீள் துண்டுகளாக வெட்டி எடுங்கள்.கிரேப்ஸ் முழுதாகப் போட்டுக்கோள்ளலாம்.

துளசி இலைகளை மிகவும் சிறியதாக வெட்டிக் கொள்ளுங்கள்.

லெமென் சாற்றுடன், உப்பு. பெப்பர் பவுடர், தேன் கலந்து கலக்கிக் கொள்ளுங்கள்.

ஒரு போலில் பழங்களைப் போடுங்கள்.  கலந்து எடுத்த சாற்றை மேலே ஊற்றி பிரட்டிவிடுங்கள்.

வெட்டி எடுத்த துளசி இலையை  தூவி விடுங்கள்.

புதிய சுவையில் சலட் தயாராகிவிட்டது. ஹெல்த்துக்கும் உகந்ததாகும்.

 பழங்கள் பற்றிய எனது ஏனைய பதிவுகளுக்கு

பயன் தரும் பழங்கள் 2

மாதேவி



அனைவருக்கும் இனிய புதுவருட வாழ்த்துக்கள்.

சலட் வகைகளின் போஷாக்கு முக்கியத்துவம் பற்றி தற்பொழுது அனைவரும் நன்கு அறிந்துள்ளார்கள். சலட் இல்லாத விருந்தும் இல்லை.

இது கிறிஸ்மஸ்ட் புதுவருட பண்டிகைக் காலமாகையால் இச் சலட்டைத் தயாரித்துள்ளேன்.

பிரிஜ்சில் இருந்த பொருட்களை வைத்து அவசரமாகத் தயாரித்ததில் பூரணமாகப் பூர்த்திசெய்ய முடியவில்லை.

நீங்கள் உங்களுடைய திறமைகளைப் பயன்படுத்தி இன்னும் அழகாக்கிக் கொள்ளுங்களேன்.

பச்சையாக உண்ணக்கூடிய மரக்கறிகள், அவித்தெடுத்த மரக்கறிகள், பழவகைகளில் செய்துகொள்ளலாம். சாப்பிடுவதற்கு சற்று முன்பாக செய்துகொள்ளுங்கள்.

உங்களுக்கு விரும்பிய மரக்கறி அல்லது மாமிச ஸ்ரப் (Stuff) இரண்டு தயாரித்து வையுங்கள்.

லெட்யூஸ் சலட் இலைகளை தயாரிக்கும் பிளேட்டில் அலங்காரமாக அடுக்கி வையுங்கள்.

வெள்ளரிக்காயின் தோலைச் சீவிவிட்டு விரும்பிய உயரத்தில் வெட்டி எடுங்கள்.

உள்ளிருக்கும் சதைப்பகுதியை கூரிய கத்தியால் வெளியே எடுத்து விட்டு தயாரித்த ஒரு ஸ்ரப்பை நிரப்பி வையுங்கள்.

மேலேஅவித்தெடுத்த கரட்டின் நுனிப்பகுதியை ருத் பிக்கில் குத்தி திரி போல் தோற்றமளிக்கும்படி வெள்ளரி மேல் குத்திவிடுங்கள்.

நன்கு நேராக நிமிர்த்தி வைக்கக் கூடிய கரட்டை அவித்து எடுத்துக் கொள்ளுங்கள்.



கரட்டின் பக்கப் பாட்டில் மெழுகு உருகி வழிந்திருப்பது போன்று மெல்லியதாக நீளமாக வெட்டிய கோவாவை தொங்க விட்டுக் கொள்ளுங்கள்.

இதற்கு நீங்கள் விரும்பினால் அவித்த நூடில்ஸ், முளைக்க வைத்த பாசிப்பயறு அல்லது சீஸ் துருவல் (கொழுப்பு) பயன் படுத்திக் கொள்ளலாம். அடித்தெடுத்த கிழங்குக் கிறீம், பிரெஸ்கிறீம், மயோனிஸ், யோக்கட், தயிர் என்பனவும் பயன்படுத்தலாம்.



தக்காளியைப் பாதியாக கிண்ணம் போல் வெட்டிவிட்டு, உள்ளிருக்கும் சதைப்பகுதியை கூரிய கத்தியால் வெளியே எடுத்து விடுங்கள். தயாரித்த இரண்டாவது ஸ்ரப்பை (Stuff) நிரப்பி வையுங்கள். மேலே பழுத்த சிவப்பு அல்லது பச்சை மிளகாய் குத்திவிடுங்கள். விரும்பினால் அடியில் மெழுகு வடிந்தது போல் வைக்கலாம்.

சலட்டின் சென்ரர் பகுதியில் வெங்காயத்தைப் பூ போன்று வெட்டி வைத்து மேலே செறி வைக்கலாம்.

உங்கள் கலை நயத்திற் கேற்ப அழகாகத் தயாரித்துக் கொள்ளுங்களேன்.

ஸ்ரிம் வெண்டக்காய், அவித்த சோளமொத்தி, அவித்த முட்டை, கப்சிகம் மூன்று வர்ணங்களில், கரும்பு, பேபிகோன், பேபிகரட், முள்ளங்கி, தேங்காயின் உள்ளிருக்கும் முளைத்த பூ என இன்னும்…… இன்னும் ..



பழங்களில் ஸ்ரோபெரி, பியஸ், அப்பிள், ஆரெஞ், தர்பூசனி, அன்னாசி, பப்பாளி, ஜம்பு, ஏன்…..

எங்கள் ஊர் வாழைப்பழம் கூட…. கறுக்குமா ?

தோலுடன் அடியையும் நுனியையும் வெட்டிவிட்டு தயிர் அல்லது எலுமிச்சம் சாறு தடவி விட்டால் சரி என்கிறீர்களா?

உங்கள் கைவண்ணங்களில் ரெடியாகிவிடும் மெழுகுதிரி சலட்டுக்களாக.

வாண்டுகளும் கூடி உதவிசெய்வார்கள். ஐடியாக்களும் கொடுப்பார்கள். விரும்பி எடுத்தும் உண்பார்கள்.

புத்தாண்டில் அனைவரும் நலமுடன் வாழ வாழ்த்தும்

மாதேவி.

>உணவில் கீரை இலையை அடிக்கடி சேர்த்துக் கொண்டால் உடலுக்கு இரும்புச் சத்தும் சுண்ணாம்புச் சத்தும், தாமிரம் கல்சியம், மக்னீசியம் போன்ற தாதுக்களும் தாராளமாகக் கிடைக்கும்.

இதனால் உடலும் நோய் எதிர்புச் சக்தி கொண்டதாக இருக்கும். இரத்த சோகை ஏற்படுவதையும் தடுக்க முடியும்.

நாளந்தம் வெவ்வேறு வகையான இலை வகைகளை சமையலில் சேர்த்துக் கொள்வது நல்லது. இப்பொழுது நகரங்களிலும் வண்டில்களில் விதவிதமான இலைக் கீரைகள் கூவிக் கூவி விற்பனையாகின்றன.


எமது முன்னோர் கீரையின் முக்கியத்துவத்தை அறிந்துதான் வீட்டைச் சுற்றிவரவும் பலவிதமான கீரை வகைகளை நாட்டி வைத்தனர். நாள் வீதம் அவற்றைச் சேர்த்து உண்டு நீண்ட காலம் நலமே வாழ்ந்தும் வந்தனர்.

சில கீரைவகைள் மருத்துவ உணவுகளாகவும் விளங்குகின்றன.

மருத்துவத்தில்

துளசி இலை, கற்பூரவல்லி, வெற்றிலை, என்பன சளித்தொல்லையை நீக்கும். நேரடியாகப் பறித்து உண்ணும் மருந்தாகவும் விளங்குகின்றன. சமையலிலும் இடம் பிடித்துள்ளன. அடை, சப்பாத்தி, கஞ்சி உணவுகளில் கலந்தும் சமைக்கலாம்.

துளசி இலைச் சாறு பருகுவதால் பன்றிக் காய்ச்சலைக் குணமாக்க முடியுமாம்.


புளியம் இலை, வேப்பம் இலையில் குருத்தை எடுத்து சட்னி செய்து கொள்ளலாம்.

பானமாக

அறுகம் புல் யூசாகவும் புல்லைக் காய வைத்து எடுத்து மல்லியுடன் கலந்து பவுடர் செய்து கோப்பிக்குப் பதிலாகவும் அருந்திக் கொள்வார்கள்.

வெங்காயத் தாரை, இஞ்சித் தாரை, கற்றாளை, எலுமிச்சம் இலை, தோடை இலை, கறுவா இலை, போன்ற இன்னோரின்ன இலை வகைகளும் சமையலில் இடம் பெறுகின்றன.

இறைச்சிக் கறிபோல

பனங்குருத்து, தென்னங் குருத்து, என்பவற்றிலும் கறி செய்து கொள்ளலாம். இறைச்சிக் கறிபோன்று இருக்கும்.

இறைச்சியை மெதுமையாக்க

ஆட்டிறைச்சி வெட்டியவுடன் மெதுமையாக இருப்பதற்காக பப்பாளி இலை, பனை ஓலை என்பவற்றில் சுற்றி வைத்திருப்பர். பப்பாளி இலை மற்றும் காய் என்பன இறைச்சியை மெதுமை அடையச் செய்யும் என்பர்.

டெங்கு, பன்றிக் காய்ச்சல்கள்

அண்மையில் பப்பாளி இலைச் சாறு டெங்குக் காச்சலின் போது வெண்குருதி சிறுதுணிக்கை எண்ணிக்கையை அதிகரிக்கும் என இலங்கை மருத்துவர்கள் சிலர் அண்மையில் ஆய்வு செய்து கண்டறிந்ததாக செய்திகள் தெரிவிக்கின்றன.

அதே போல குஜராத் ஆயுர்வேத பலகலைக்கழக ஆய்வு பன்றிக் காய்சலுக்கு காரணமான வைரசையும் மற்றெந்த வைரஸ் பாதிப்பையும் கட்டுப்படுத்தும் ஆற்றல் துளசிக்கு இருப்பதாகக் கூறுகிறது.

விருந்தோம்ப

ஆதிகாலம் தொட்டு வாழை இலை, தாமரை இலை விருந்து ஓம்பினர். பலா இலை, ஆலம் இலை, பன்னீர் இலை என்பவற்றில் தொன்னை செய்து உணவு உண்டனர்.

சமையலில் உதவியாக

பூவரசம் இலையில் வடை, அரியதரம் தட்டிப் பொரிப்பர்.

சிற்றுண்டி வகைகள் காயாமல் இருக்க மூடல்ஓலைப் பெட்டியின் அடியில் இவ்விலைகளைப் பரப்பி அதன் மேல் உணவை வைத்து மூடி வைப்பர். இலை வாசம் சிற்றுண்டியிலும் பரவி சுவையைத் தரும்.

இட்லி அவிக்க முள்முருக்கம் இலையைப் பயன்படுத்தினர். இட்லி மென்மை அடைவதுடன் இலையின் மணமும் கூடி வரும்.

யப்பானியர் தேயிலை இலையை பச்சையாகவே அருந்தும் வழக்கம் உள்ளவர்கள். அவர்களது நீண்ட வாழ்க்கைக்கு இதுவும் ஒரு காரணம் என்பர். இப்பொழுது உலகெங்கும் கிறீன் ரீயின் புகழ் பரவி வருவது தெரிந்ததே.

அழகு சாதனமாக

தற்பொழுது ஹேர்பல் அழகு சாதனமாகவும், மருத்துவ குணமுடையதாகவும் பிரசித்தம் உள்ளதை எல்லோரும் அறிந்து உள்ளீர்கள்தானே.

இராமாயணத்தில் அனுமார் சஞ்சீவி மலையையே பெயர்த்து வந்ததாக கதை உண்டு. இலைகளும் அவற்றின் பயன்களும் அறிந்த நாம் அவற்றை கூடுதலாக உணவுகளில் சேர்த்து உண்டு ஆரோக்கியமாக வாழலாமே.

இன்று முருங்கையிலை விருந்து


முருங்கை இலை 100 கிறாமில் –
கலோரி 92, புரதம் 6.7, கொழுப்பு 1.7, கல்சியம் 440, இரும்பு 7, கரட்டீன் 3600, விட்டமின் சீ 220 என சத்துக்கள் அடங்கி இருக்கிறது.

முருங்கைக் கீரை பால் சொதி

முருங்கைக் கீரை – 1 கப்
சின்ன வெங்காயம் – 6,7
இளம் சிவப்பான பச்சை மிளகாய் – 4 (பச்சை நிறத்துடைய மிளகாயைத் தவிர்த்து இளம் சிவப்பு மிளகாய் சேர்துக் கொண்டதும் முருங்கை இலையை எடுத்துச் சாப்பிடும் போது மிளகாயை இலகுவாக எடுத்து அகற்றலாம்.)
2தேங்காய்ப் பால் – 2 கப்
தண்ணீர் – ¼ கப்
உப்பு தேவையான அளவு
மஞ்சள் பொடி விரும்பினால்
தேசிச்சாறு – 1 தேக்கரண்டி

தாளிக்க விரும்பினால்

கடுகு – ¼ ரீ ஸ்பூன்
உழுத்தம் பருப்பு – ½ ரீ ஸ்பூன்

இலையைக் கழுவி எடுத்துக் கொள்ளுங்கள். வெங்காயம் நீளமாக வெட்டி வையுங்கள்.

பச்சை மிளகாய்களை வாயைக் கீறிவிடுங்கள்.

பாத்திரத்தில் இவற்றைப் போட்டு உப்பிட்டு தண்ணீர் ஊற்றி 5-7 நிமிடங்கள் இலை அவியும் வரை அவிய விடுங்கள்.

அவிந்ததும் தேங்காய்ப் பால் ஊற்றிக் கலக்கிவிடுங்கள். பால் திரளாமல் இருக்க சில துளிகள் எலுமிச்சம் சாறு சேர்த்து கலக்கி கொதிக்கவிடுங்கள்.

அடிக்கடி கலக்க வேண்டும்.

கொதித்துவர இறக்கி கோப்பையில் ஊற்றி மீதி தேசிச் சாறை கலந்து கலக்கி விடுங்கள்.


முருங்கைக் கீரை வாசத்துடன் தேங்காய்ப் பாலின் மணமும் சேர்ந்து உண்ண அழைக்கும்.

தாளிக்க விரும்பினால் தாளித்துக் கொட்டி கலக்கிவிடுங்கள்.

சாதம், பிட்டு, இடியாப்பம், பாண் ஆகியவற்றிற்கு ஊற்றிச் சாப்பிட அருமையாக இருக்கும்.

விரும்பினால் பூண்டு, மிளகு தட்டிப் போட்டுக் கொண்டால் சற்று மாறுதலான சுவை கிடைக்கும்.

அகத்தி, முல்லை இலை, முசுட்டை இலை, கீரைத் தண்டு, தூதுவளை இலை, பொன்னாங்கண்ணி இலை மணத்தக்காளி இலை என்பவற்றிலும் இது போன்ற சொதி செய்து கொள்ளலாம்.

மீன் சொதியிலும் கலந்து செய்து கொள்ளலாம்.

மாதேவி

>“தோடம்பழம் தோடம்பழம்
சோக்கான தோடம்பழம்
அம்மாவுக்கு ஒரு பழம்
அப்பாவிற்கு இரண்டு பழம்
பாட்டிக்கு ஒரு பழம்
அண்ணாவுக்கு ஒரு பழம்
தம்பிக்கும் எனக்கும் பாதிப் பழம்.”

சிறுவயதில் ஆசிரியர் அபிநயத்துடன் சொல்லிக் கொடுத்து பாடிய பாடலின் நினைவுதான் இது.

பாடும்பொழுது கடைசி வரி பாடு முன்பே கவலை வந்துவிடும்.

“எனக்குப் பாதிப் பழம்” எனப் பாட விரும்பம் வராது.

அப்பாவின் அந்த இரண்டு பழத்தில் எனக்கு என்று மாற்றிப்பாடவே எண்ணம் வரும். எப்பொழுது அப்பாவின் இரண்டு பழத்தையும் பறிக்கலாம் என்ற நினைவே இருக்கும்.

இது எல்லாக் குழந்தைகளுக்கும் ஏற்படும் இயல்பான குணமே. என்னையும் எப்பொழுது பெரியவனாக நினைப்பார்கள் என்ற ஆதங்கம் அவர்களுக்கு மேலோங்கி நிற்பதில் வியப்பில்லை.

“அணிலே அணிலே ஓடி வா
கொய்யா மரம் ஏறி வா
குண்டும் பழம் கொண்டு வா ….”

பாலர் வகுப்பில் அனைவரும் விரும்பிப் பாடிய பாடல்தான்.

‘குண்டுப்பழம்’ என்று சொல்லும் போதே எல்லோர் முகங்களில் மகிழ்ச்சியும், ‘கொறித்துக் கொறித்துத் தின்னலாம்’ எனப் பாடுகையில் வாயில் சிரிப்புமாக ரசித்து ருசித்து கூட்டாகப் பாடிய நாட்கள் அழியாத தொடர்களாக வந்து போய்க் கொண்டே இருக்கின்றன.

இப்பொழுது இதைப் படிக்கும்போது உங்களுக்கும் எத்தனையோ ‘பழப் பாடல்கள்’ நினைவுகளில் வந்து போகலாம்.

கொழும்பு கண்டி வீதியில் பயணம் செய்யும்போது கஜுகமவில் (Cadju Gama) கஜீ (முந்திரி) விற்பனை செய்யும் அழகிய பெண்களைக் காணலாம்.

இரவில் வீதி ஓரங்களில் அமைக்கப்பட்ட குடிலில் பெற்றோல் மக்ஸ் வெளிச்சத்தில், அடர் வரணத்தில் பூக்களுடன் கூடிய பாரம்பரிய சிங்கள உடையான கம்பாயம் உடுத்திய பெண்களைக் காணலாம்.

கைகளிலே சுருக்கு வைத்துத் தைத்த டீப் நெக்குடன் கூடிய உடலை எடுப்பாகக் காட்டும் சிறிய பிளவுஸ் அணிந்திருப்பார்கள். அவர்கள் அழகை ரசிப்பதற்காகவே வாகனங்களை நிறுத்தி கஜீ வாங்குவோர் அதிகம்.

ரம்புட்டான், மங்குஸ்தான், அன்னாசி, டூரியான், பட்டர் புருட், கொய்யாப் பழங்கள் குவிந்து கிடப்பதையும் இப் பாதையால் பயணம் செய்வோர் கண்டு களிக்கக் கூடியதாக இருக்கும்.

பழங்களிலே யாழ்ப்பாணத்து கறுத்தக் கொழும்பு மாம்பழமும், ஊட்டி அப்பிளும், நுவரெலியா பியர்ஸ்சும், மல்வானை ரம்புட்டானும், மலை வாழப்பழமும், முல்லைத்தீவு பலாப்பழமும், அவுஸ்திரேலியன் மன்டரினும் என வேறு பலவும் சுவையில் பிரபலம் அடைந்துள்ளன.

இப்பொழுது கொழும்பு நகர் வீதிகளில் கூட தெருவோரங்களில் தள்ளு வண்டிகளில் எல்லா வகைப் பழங்களும் குறிப்பாக கறுத்தக் கொழும்பு மாம்பழமும், குவியல் குவியல்களாக கொட்டிக் கிடக்கின்றன. சீனிஆகாதோர் தவிர்த்து ஏனைய எல்லோருக்குமே கொண்டாட்டம்தான்.

பழங்கள் கெடாமல் இருப்பதற்கும், பளபளப்பு ஊட்டுவதற்கும் ரசாயன ஊட்டிகள் பயன்படுத்தப்படுவது வேதனைக்கு உரியதே. சம்பந்தப்பட்டோர் கவனத்தில் கொள்வார்களா?

பளபளப்பான, நீண்ட காலம் குளிர் ஊட்டியில் தவங் கிடந்த பழங்களை வாங்கி உபயோகிப்பதைத் தவிர்த்து இயன்றவரை புத்தம் புதிய பிரஸ் ஆன, மருந்தடிக்காத பழங்களை உண்பது நல்லது.

ஆனால் இன்றைய காலகட்டத்தில் இதையெல்லாம் தேட முடியுமா?

இலகுவாகத் தயாரிக்கக் கூடிய புருட் சலட்


இதில் கலரிங், எசன்ஸ், கஸ்ராட், பால், எவையுமே சேர்க்கப்படவில்லை. அதனால் ஹெல்த்திற்கும் நன்மை தரும்.

இரண்டு மூன்று வகை பழவகைகள் இருந்தாலே இந்த முறையில் தயாரித்துக் கொள்ளலாம். விரும்பினால் நட்ஸ் பிளம்ஸ் சேருங்கள்.

தேவையான பொருட்கள்.

ஆப்பிள் – 1
ஒரேன்ஞ் – 1
பைன் அப்பிள் – 2 துண்டுகள்
பப்பாளி சிறியது – ½
கிறேப்ஸ் அல்லது மாதுளை முத்துக்கள் – சிறிதளவு
தேன் – 1 டேபிள் ஸ்பூன் அல்லது சீனி- 2 ரீ ஸ்பூன்
லைம் ஜீஸ் – பாதி
தண்ணீர் – 4 டேபிள் ஸ்பூன்

1. பழங்களை பெரிய துண்டுகளாக வெட்டி எடுத்து ஒரு புருட் போளில் வையுங்கள்.
2. தண்ணீருடன் எலும்மிச்சம் சாறு சேர்த்துக் கலக்கி;க் கொள்ளுங்கள். இத்துடன் சீனி அல்லது தேன் கலந்து விடுங்கள்.
3. பழங்கள் மேல் ஊற்றி பிரிஜ் இல் வைத்து விரும்பிய நேரம் சாப்பிட்டுக் கொள்ளுங்கள்.

கவனத்திற்கு
எலும்மிச்சம் சாறை புருட் சலட்டில் சேர்க்கும் பழங்களின் புளிப்பின் தன்மையைப் பொறுத்து அளவைக் கூட்டிக் குறையுங்கள்.

மாதேவி

>ஆதிமனிதன் தோன்றிய காலத்தில் உணவைத் தேடி அலைந்து திரிந்தான். பழங்கள், கிழங்குகள், விதைகள் என்பவற்றை நேரடியாக உண்ணத் தொடங்கினான்.

பின்பு இறைச்சி வகைகளை தீயில் வாட்டி, சுவை சேர்க்க உப்பிட்டு தேனிட்டு, பிற்காலத்தில் காரம் சேர்த்து, அதன் பின் வாசனை ஊட்டி என உணவு தயாரிக்கும் முறைகளில் காலம் தோறும் மாற்றங்கள் பல ஆண்டுகளாக ஏற்பட்டு வந்திருக்கிறது என்பதை நாங்கள் எல்லோரும் வரலாறுகள் மூலம் அறிந்திருக்கிறோம்.

இவ்வழிமுறைகளில் கோடை காலத்திற்கு ஏற்ற உணவு வகைகள், குளிர்காலத்திற்கு ஏற்ற உணவு வகைகள் என வெட்ப தட்ப நிலைக்கு ஏற்ப பிரித்து உண்பதால் உடல் ஆரோக்கியமும் கிடைக்கும். நோய்களின்றும் காப்பாற்றிக் கொள்ளலாம் எனக் கூறியுள்ளார்கள்.

இவற்றில் வெட்ப காலங்களில் பழங்கள், தயிர், பால்,மோர், இளநீர் கூழ், கஞ்சி கீரைவகைகள், வெண்டி, தக்காளி, வெங்காயம் நீர்த்தன்மையுடைய காய்வகைகளான வெள்ளரி, சவ்சவ், பீர்க்கு, நீத்துக்காய், சுரைக்காய், புடலங்காய், முள்ளங்கி போன்றன குளிர்ச்சியைத் தரும், வெப்பத்தைத் தணிக்கும் உணவுகளாக இருந்து வருகின்றன.

வெயில் வெப்பதால் உடலிலிருந்து வியர்வை வெளியேறுவதால் தண்ணீர்த் தாகம் அதிகரிக்கும். அதற்கு ஈடுகொடுக்க நீர்த்தன்மையுள்ள உணவுகளை உண்பது தாகத்தைத் தணிக்கும். அத்துடன் குளிர்ச்சியை வெப்ப காலத்தில் எமது நா விரும்புவதாலேயே கோடையில் மண்பானைத் தண்ணீர், ஜில்ஜில் ஜீஸ், ஐஸ்கிறீம் என ஓடுகிறோம்.

இவ்வகையில் கோடைக்கு ஏற்ற ஜில்லென்று ஒரு சலட்தான் தர்ப்பூசணி.

குழந்தைகளைக் கவரும் விதமாகவும் விரும்பி உண்ணும் விதமாகவும். வெட்டி அலங்கரித்துக் கொள்வோம் வருகிறீர்களா? செய்வோம்.


தேவையானவை
தர்ப்பூசணி – 1 பழம்
பச்சை அப்பிள் – 1
சலட் இலைகள் – 5
சர்க்கரை – ½ ரீ ஸ்பூன்
லெமன் ஜீஸ் – 1 ரீ ஸ்பூன்
கறுவாப்பொடி சிறிதளவு
மிளகுதூள், உப்பு தேவையான அளவு

தயாரிப்போம்

தர்ப்பூசணியை குறுக்கு வாட்டில் வெட்டி வெளிக்கோப்பை சிதையாதவாறு உள்ளிருக்கும் பழச்சதையை வெட்டி எடுங்கள்.

விதையை நீக்கி சிறுசிறு துண்டுகளாக வெட்டி வையுங்கள்.


அப்பிளை தோலுடன் சிறு துண்டுகளாக்கிக் கொள்ளுங்கள்.

தர்ப்பூசணி தோலுடன் மூடிய கோப்பையை உப்பு நீரில் அலசி எடுங்கள்.

சேர்விங் பிளேட்டில் கழுவிய சலட் இலைகளை அடுக்கி அதன்மேல் தர்ப்பூசணி கோப்பையை வையுங்கள்.

வெட்டிய தர்ப்பூசணி துண்டுகளுடன் அப்பிளை கலந்து மிளகு தூள் கறுவாப்பொடி தூவி எடுத்து தர்ப்பூசணி கோப்பையில் வையுங்கள். (விரும்பினால் பிரிட்ஸில் வைத்து எடுக்கலாம்.)

பரிமாறும் பொழுது உப்பு, சர்க்கரை, லெமன் ஜீஸ் கலந்து விடுங்கள்.

கண்ணைக் கவரும் சிவப்பு நிறத்துடன் இனிப்பு, நீர்த்தன்மை சுவை சேர்ந்த சலட் தயாராகிவிட்டது.

ஹெல்த்துக்கும் ஏற்றதுதானே.

குறிப்பு

உப்பு, சர்க்கரை. லெமன் முதலே கலந்து வைத்தால் நீர்த்தன்மை கூடிவிடும் என்பதால் உடனே சேர்ப்பதுதான் நன்று.

மாதேவி

>கப்ஸிகம் என அழைக்கப்படும் இது மிளகாய் குடும்பத்தைச் சேர்ந்தது. இதில் விட்டமின் சி அடங்கியுள்ளது. விட்டமின் ஏ யைக் கொடுக்கும் கரோட்டினும் அதிகம் உண்டு.

பொதுவாக மிளகாய் இனத்தில் காரவகை, காரம் குறைந்த ஸ்வீட் பெப்பர் என இவற்றின் சுவை இருக்கும். பெப்பர் கோர்ன், பெல் பெப்பர், பவ்ரிகா பெப்பர், மெக்ஸிகன் பெப்பர், ரெட் பெப்பர், சில்லி பெப்பர், என இன்னும் பல வகையில் கிடைக்கின்றன.

இவை உணவில் காரத்திற்காகவும், வாசனைக்காகவும் பயன்படுத்தப்படுகிறது. அத்துடன் உணவு செமிபாட்டிற்கு உதவக் கூடியது.

குடமிளகாய் பச்சையாகவே உண்ணக் கூடியது. ஏனைய உணவுகளுடன் கலந்தும் சமைத்துக் கொள்ளலாம்.

இன்று நிரப்பல் கொண்டு தயாரிக்கப்பட்ட குடமிளகாய் சலட் செய்து கொள்வோம். இங்கு பச்சைநிற குடமிளகாய் பயன்படுத்தப்பட்டுள்ளது. விருந்துகளின் போது அனைவரின் கண்ணையும் கவர்வதற்கு பல வர்ணங்கiளைக் கொண்ட குடமிளகாய்களைப் பயன்படுத்தலாம்.

குடமிளகாய் நிரப்பலுக்கு

சிவப்பு குடமிளகாய் – 1
பச்சை குடமிளகாய் – 1
மஞ்சள் குடமிளகாய் – 1
விரும்பிய அரைத்த இறைச்சி – ½ கப்
விரும்பிய மீன், இறால் அல்லது நண்டு – ½ கப்
முட்டை – 2
வெங்காயம் – ½
மிளகாய்த் தூள் – ¼ ரீ ஸ்பூன்
சீரகத்தூள்- சிறிதளவு
மஞ்சள் தூள் – சிறிதளவு
தேசிச்சாறு – சில துளிகள்
உப்பு- தேவைக்கேற்ப
சீஸ் துருவல் அல்லது பிரஸ் கிறீம் –

செய்து பாருங்கள்

இறைச்சி, உப்பு மிளகாய்த்தூள், மஞ்சள் தூள், சிறிதளவு தண்ணீர் கலந்து அவித்தெடுத்து வையுங்கள். (அல்லது சற்று ஓயிலில் வெங்காயம், பூண்டு தாளித்து இறைச்சியைச் சேர்த்துப் பிரட்டி உப்பு மிளகாய்த்தூள், மஞ்சள் தூள் போட்டு, சற்று வேக இறக்கும்போது ஒருரீஸ்பூன் டொமாடோ சோஸ் விட்டு எடுத்து வையுங்கள்.)

மீனை உப்பு, மஞ்சள் தூள், கலந்து சற்று நீர்விட்டு அவித்தெடுத்து முள் நீக்கி உதிர்த்து, வெங்காயம், மிளகு தூள், சீரகத் தூள், தேசிச்சாறு கலந்து எடுத்து வையுங்கள்.

முட்டையை அவித்து எடுத்து சிறிய துண்டுகளாக வெட்டி சீஸ் துருவல், மிளகு தூள், உப்பு, விரும்பினால் கடுகு பேஸ்ட் கலந்து எடுத்து வையுங்கள்.

குடமிளகாயை எடுத்து மேலே காம்புடன் மூடி போன்று வெட்டி எடுத்து வையுங்கள். சலட்களை எடுத்து குடமிளகாயுள் தனித்தனியே நிரப்பி மேலே சீஸ் துருவல் தூவி விடுங்கள். அல்லது பிரஸ் கிரீம் போட்டு வெட்டிய மூடிக் காம்பை மேலே வைத்து விடுங்கள்.

மூவகை சலட்டையும் நீங்கள் விரும்பினால் லேயெஸ் (layers)ஆகவும் ஒரு குடமிளகாயினுள் போட்டு நிரப்பிக் கொள்ளலாம்.

மாமிசம் தவிர்த்து உண்பவர்கள் தக்காளி, கரட், வெங்காயம், வெள்ளரிக்காய், அவித்த கிழங்கு, சோயா பயன்படுத்தி நிரப்பிக் கொள்ளலாம்.

பிளேட்டை எடுத்து வட்டமாக வெட்டிய வெங்காயம், தக்காளியை வைத்து அதன்மேல் நிரப்பிய குடமிளகாய்களை வைத்து கண்ணைக் கவரப் பரிமாறுங்கள்.

மாதேவி

>இயற்கையாகவே இலகுவாகக் கிடைக்கக் கூடிய தாவர உணவு இது. விலை குறைந்த போதும் போஷாக்கு மிகுந்தது. பல வகை உணவுகளிலும் சேர்த்துத் தயாரிக்கக் கூடியது.

இரும்புச்சத்து

இதிலுள்ள இரும்பு, இரத்தத்தில் உள்ள ஹீமோகுளோபின் உற்பத்திக்கு மிகவும் அவசியமானது. இரும்புச் சத்துக் குறைவு இரத்த சோகையை ஏற்படுத்தும் என்பதை எல்லோரும் அறிவோம். அதைத் தடுப்பதற்கு கூடியளவில் கீரைகளை நாளாந்தம் எமது உணவில் சேர்த்துக் கொள்ளல் வேண்டும் என்பதும் அனைவருக்கும் தெரிந்ததுதான்.

குழந்தைகளுக்கும் இளவயதினருக்கும் கர்ப்பிணிகளுக்கும் மிகவும் முக்கியமானது. அனைவருமே உணவில் சேர்த்துக் கொள்வது நன்மை தரும்.

இலைவகைகள் பலவகையானவை. முளைக்கீரை, சிறுகீரை, பொன்னாங்காணி, அகத்தி, வல்லாரை என அடுக்கி கொண்டே போகலாம். கோவா, லீக்ஸ்ம் இலை வகைகளில் அடங்கும்.

கிழங்குகளின் இலைகள்

வத்தாளை, மரவெள்ளி, பீற்ரூட், கரட், முள்ளங்கி, கோலி ப்ளவர், பூசணி இலைகளும் உண்ணப்படுகின்றன. இவற்றில் கிழங்கை விட இலைகளே அதிக சத்துள்ளவை.

எனவே இவற்றின் இலைகளை வீசத் தேவையில்லை. இலைகளை சிறியதாக வெட்டி பருப்பு வகைகளுடன் சமைத்துக் கொள்ளலாம். பொரியல், சூப், சொதி வகைகள் செய்து கொள்ளலாம்.

எமது உணவு அரிசி உணவாக இருப்பதால் தினமும் 50கிராம் ஆவது பச்சையிலைகளை உணவில் சேர்ப்பது மிகவும் அவசியமாகும். இலைகளிலிருந்து இரும்பு, புரதம், கல்சியம், கரட்டீன், நார்ப் பொருள் என்பன எமது உடலுக்குக் கிடைக்கின்றன.

புற்றுநோயைத் தடுக்கும்

இலைகளை அதிகம் உண்பவர்களுக்கு பெருங் குடல், சிறுநீரகம், சுவாசப்பை, மார்பு ஆகியவற்றில் புற்றுநோய் உண்டாவது ஏனையவர்களைவிடக் குறைவு என சில ஆய்வுகள் கூறுகின்றன.

மலச்சிக்கலையும் தடுக்கும்

கீரையில் உள்ள நார்ப்பொருள் மலச்சிக்கலை ஏற்படுத்தாமல் தடுக்கின்றது. வல்லாரையில் 68.8 மி.கிராம் இரும்பும், பஸன் இலைகளில் 25.5, வத்தாளையிலையில் 16.3, பீட்ரூட் இலையில் 16.2 உண்டு.

‘பொன்னை எறிந்தாலும் பொடிக் கீரையை எறியாதே’
‘வீட்டுச் செல்வம் மாடு, தோட்டச் செல்வம் கீரை’
போன்ற பழமொழிகள் உண்டு

கீரை வகைகளின் போஷாக்கு

கொத்த மல்லி,புதினா, கறிவேற்பிலை இல்லாத இலங்கை இந்திய சமையலே இல்லை என்றே கூறலாம். சட்னி, கறிவகைகள்,சூப், பிரியாணி, பூட் டெகரேசன், ஹெல்த், என அசத்தும் இவற்றை குயீன்ஸ் ஒவ் கிறீன் லீவ்ஸ் எனக் கூறினால் மிகையில்லை.

பார்ஸ்லி, செலரி, லெடியுஸ்- மேலைத் தேச உணவுகளில் அசத்தும் இவை சலட், சான்ட்விச், புரியாணி, அலங்கரிப்பதற்காகவும் பயன்படுகின்றன.

முளைக் கீரை சிறுகீரை, அகத்திக் கீரை, அறக்கீரை, காட்டுக்கீரை, மூக்கிறைச்சிக்கீரை, ஆகியன கீரை மசியல், மோர்க் குழப்பு, பொரியல், காரக் குழம்பு, பச்சடி, புட்டு, வடை, சொதி செய்து கொள்ள பயன்படும்.

அகத்திக் கீரையில் அதிகளவு புரதம் (8.4கிராம்), கல்சியம் (1130 மிகி), கரட்டீன் (5280 மைக்ரோ கிறாம்) உண்டு என்பது குறிப்பிடத்தக்கது.

வெந்தயக் கீரை இதில் கனிம உப்புகள், புரதம், விற்றமின் அடங்கியுள்ளன. வெந்தயக் கீரையுடன் உருளைக்கிழங்கு சேர்த்து வட இந்தியாவில் உணவுகள் தயாரிப்பார்கள். சட்னி, சப்பாத்தி, ரொட்டி, கறி, துவையல், புரியாணி ஆகியன தயாரித்துக் கொள்ளலாம்.

வல்லாரைக் கீரை ஞாபக சக்தியை அதிகரிக்கும், கண் பார்வைக்கு நல்லது எனக் கூறப்படுகிறது. கஞ்சி, ரொட்டி, சட்னி, சலட் தாயாரிப்பில் பயன்படுகிறது.

பொன்னாங்காணிக் கீரை இரும்பு 2.8(கிராம்), கரோட்டின் (3900 மைக்ரோ கிறாம்) ஆகியன அதிகம் உண்டு. புரதம் 2.7 உள்ளது. தொடர்ந்து சாப்பிட்டு வர மேனி பளபளக்கும் என முன்னோர் கூறுவர். தலை முடி வளர்த்திக்கும், கண் பார்வைக்கும் நன்மை தரும் என்று சொல்லப்படுகிறது. பால்கறி, பாற்சொதி, பொரியல் செய்து கொள்ளலாம்.


முருங்கைக் கீரை இரும்பு 7.0(கிராம்), கரோட்டின் (3600 மைக்ரோ கிறாம்), கல்சியம் (440 மிகி) உண்டு. குளிர் காலத்திற்கு ஏற்ற உணவாகக் கருதப்படும் இது வெயில் காலத்தில் சாப்பிடுவது வெப்பம் தரும் எனச் சொல்லப்படுகிறது. இதற்கு விஞ்ஞான பூர்வ ஆதாரம் இருந்தால் கூறுங்கள்.

கர்ப்பணித் தாய்மாருக்கு உகந்த இலை. பொரியல், பாற்சொதி, ரொட்டி, அடை, வடை, சூப், சாம்பார் சாதம் அவற்றில் சேர்த்துக் கொள்ளலாம்.

மாதேவி

>


சாதாரண கீரை மசியல், கீரைப் பொரியல், இரண்டும் சாப்பிட்டு அலுக்கும் போது இப்படி செய்து கொண்டால் சுவை கொடுக்கும்.
குழந்தைகளும் கீரையை தனியே சாப்பிட அடம் பிடிப்பார்கள். மாங்காய் சலட்டுடன் கலந்து கொடுக்கும் போது அடம் பிடிக்காமல் கீரையைச் சாப்பிடுவார்கள்.
அதில் இரு வகை ருசி இருப்பதால் கலந்து சாப்பிடும் போது வித்தியாசமான சுவையைத் தரும்.
சமைத்துத்தான் பாருங்களேன். கீரைக்கு புளிப்பு சலட் சேரும்போது ஆகா சொல்லத் தோன்றும்.
செய்யத் தேவையான பொருட்கள்
1. முளைக்கீரை – 1 கட்டு
2. பச்சை மிளகாய் – 4
3. சாம்பார் வெங்காயம் – 6-7
4. பூண்டு – 4
5. மிளகு, சீரக்கப் பொடி, பெருங்காயப் பொடி – சிறிதளவு
6. அரைத்த தேங்காய் கூட்டு – 1 டேபிள் ஸ்பூன்
7. கெட்டித் தேங்காய்ப்பால் – 2 டேபிள் ஸ்பூன்
8. உப்பு தேவைக்கு ஏற்ப
சலட் செய்ய
1. மாங்காய் -1
2. சாம்பார் வெங்காயம் – 5-6
3. பச்சை மிளகாய் -1
4. சீனி – 1 ரீ ஸ்பூன்
5. உப்பு தேவைக்கு ஏற்ப
செய்முறை
கீரையைத் துப்பரவு செய்து 4-5 தரம் நீரில் கழுவி எடுத்து சிறிதாக வெட்டி வைத்துக் கொள்ளுங்கள்.
வெங்காயம் 2-3 துண்டுகளாக வெட்டுங்கள்.
மிளகாய் நீளமாக வெட்டி எடுங்கள்.
பூண்டு பேஸ்ட் செய்து வையுங்கள்.
பாத்திரத்தில் கீரையைப் போட்டு மிளகாய் உப்பு சேர்த்து, சிறிதளவு தண்ணீர் விட்டு அவிய விடுங்கள்.
அவிந்ததும் சற்று மசித்து பூண்டு பேஸ்ட் மிளகு சீரகப் பொடி வெட்டிய வெங்காயம் சேர்த்து ஒரு நிமிடம் கிளறுங்கள்.
பின் அரைத்த தேங்காய் கூட்டு, தேங்காய்ப் பால் விட்டு இறக்கி வையுங்கள்.
விரும்பினால் கடுகு வறமிளகாய் தாளித்துக் கொட்டி கலந்து விடுங்கள்.
சலட் செய்முறை
மாங்காயைத் துருவி எடுங்கள்.
புளிமாங்காய் என்றால் சிறிதளவு உப்பு நீர் விட்டு பிழிந்து எடுங்கள்.
வெங்காயத்தை சிறியதாக வெட்டி கலந்து விடுங்கள்.
மிளகாயை 5-6 துண்டுகளாக வெட்டி விடுங்கள்.
சீனி உப்பு சேர்த்து கலந்து விடுங்கள்.
பிளேட் ஒன்றில் கிறீன் லீப் கறியை இரு புறமும் வைத்து சலட்டை நடுவில் வைத்து பரிமாறுங்கள்.
புளிப்புச் சுவையுடன் கூடிய சலட் வித்தியாசமாக இருப்பதால் அனைவரையும் கவரும்.
:- மாதேவி -: